N.R.M.
прэзэнтаваў свой новы альбом
Прэзэнтацыя
новага альбома гурту N.R.M. пад назвай "Дом культуры" адбылася 22-га
студзеня ў Менску. Пакуль музыкі зладзілі толькі прэс-канфэрэнцыю для
журналістаў. Канцэртны тур гурту па ўсёй Беларусі пройдзе пры канцы лютага
альбо ў пачатку сакавіка. Між тым, нават звычайную гутарку з прэсай музыкі
здолелі ператварыць у сапраўднае шоў.
Голас Загадчыцы
ДК: -Таварышы, я сабрала вас, штобы саабшчыць давольна прыятнае ізьвесьціе. У
нашай стране адкрыўся новы Дом культуры!..
N.R.M. быў
"у сваім рэпэртуары": звычайную прэсавую канфэрэнцыю яны ператварылі
ў абсурдную пародыю на афіцыйныя мерапрыемствы, якія ў бальшыні дамоў культуры
Беларусі адбываюцца па адным і тым жа сцэнары, з удзелам практычна аднолькавых
пэрсанажаў. Праўда, тут малапісьменная загадчыца калгаснага ДК (ролю якой
віртуозна выканала Ганна Вольская) выклікала не раздражненьне, а сьмех, а
прамовы міністраў Незалежнай Рэспублікі Мроя былі зьмястоўныя й зразумелыя
шырокім народным масам.
Загадчыца ДК: -
Для таго, штобы унядрыць культуру ў масы, таварышы і пастроілі свой дом:
знаіце, ня дом прэстарэлых, ня дом цярпімасьці, ня дом масонаў, прасьці
Госпадзі, а дом культуры… Дом таго, чаго нам так не хватаіт у эта сложнае і
непрастое ўрэмя…
Міністр 1 (П.
Паўлаў): -Да чаго мы дайшлі, таварышы? Апошнім часам русіфікацыя беларускай
мовы дайшла да таго, што ўсе зараз замест "рыба" кажуць
"ріба", замест "рынак" кажуць "рінак"…Я, каншене,
не Купала і не Колас, але таксама маю голас... І хочацца сказаць, што трэба
павышаць культуру мовы!
Міністр 2 (Л.
Вольскі):
- Сьмецьце кідай
толькі ў урны,
Каб усё было
культурна!..
Нягледзячы на
гарэзьлівасьць прэзэнтацыі "Дома культуры", музыка й тэксты у альбоме
з большага сур'ёзныя, а месцамі нават дэпрэсыўныя. Гэты настрой прысутнічае і ў
афармленьні кампакту: дызайнэр Міхал Анепмпадыстаў вытрымаў вокладку ў змрочных
"асфальтных" колерах, абраўшы сымбалем альбома грувасткія абрысы
менскага опэрнага тэатра… Між тым, ня выключана, што менавіта сур'ёзныя песьні
з гэтага альбома, такія як "Маё пакаленьне", "Лёгкія" альбо
"Фабрыка", у хуткім часе зробяцца найбольш магутнымі хітамі гурту.
У альбоме
"Дом культуры", у адрозьненьні, скажам, ад "Трох
чарапахаў", няма песьні з аднайменнай назвай. Выглядае на тое, што музыкі
вырашылі нарэшце аддаць даніну ўдзячнасьці ўсім беларускім дамом культуры, у
якіх ім даводзілася граць, а заадно й падзяліцца ўласнымі ўражаньнямі.
Адмыслова для гэтага праекту быў зьняты мультымэдыйны кліп пра гастрольнае
жыцьцё N.R.M., а таксама запісаная п'еса "Дом культуры". (Менавіта зь
яе, дарэчы, і прыйшлі на прэс-канфэрэнцыю пэрсанажы загадчыцы ДК й нецьвярозага
электрыка Івана Адольфавіча). Варта заўважыць, што кампакт выпушчаны двума
накладамі: адзін зь іх - больш дарагі (CD каштуе каля 9 тысячаў рублёў), а
другі прадаецца па звычайнай цане. Вонкава яны нічым не адрозьніваюцца, але
п'есу й кліп змогуць паглядзець толькі тыя, хто набудзе "элітны"
варыянт "Дома культуры". Зрэшты, нават адносна высокая цана на
кампакт улюбёнага гурта, здаецца, ня надта палохае прыхільнікаў N.R.M. Дыск,
які паступіў у продаж яшчэ да прэзэнтацыі, без усялякай рэклямы ў прэсе,
распрадаецца імгненна. Музыкі запэўніваюць, што наклад "Дома
Культуры" досыць вялікі, каб задаволіць усіх прагных.
Як ішла праца над
новым альбомам і ці можна гэты працэс наогул назваць "працай"? Гутару
з Л. Вольскім і П. Паўлавым.
Л.В.:- Цяжка гэта
назваць працай. Як гавораць, "па кайфу" усё гэта... Праца - гэта калі
перад канцэртам ты рэпэтуеш тры разы, напрыклад, тры дні песьні 10-гадовай
даўніны, якія й так выдатна ведаеш. А стварэньне новых песень - гэта кайф
высокага ўзроўню, я б сказаў. Нават вышэй за наркатычны, напэўна...
RR: -Існуе
меркаваньне, што папулярнасьць N.R.M. - ужо як бы "столя" для
беларускамоўнага гурта. Ці можа яшчэ гэтая папулярнасьць вырасьці, і за кошт
якіх рэзэрваў?
П. Паўлаў: -
Рэзэрв у нас бясконцы. Калі нашу музыку пачуюць усе людзі Беларусі, то ўсе
будуць яе слухаць, таму што менавіта гэтая музыка для беларусаў і пра
беларусаў. "Столі" проста няма, столя залежыць толькі ад нашага
шоў-бізнэсу: ад ступені прамоўшна, ад разьвіцьця мас-мэдыя... Папулярныя
расейскія гурты навязаныя нам праз расейскія мас-мэдыя. А мы не навязаныя. І
калі мы будзем навязаныя такім жа самым чынам, я ўпэўнены, што мы будзем больш
папулярныя, чым яны.